2024 წლის საპარლამენტო არჩევნებისთვის ცესკოში აკრედიტირებული მედიასაშუალებების სიიდან იკვეთება, რომ რუსეთის რამდენიმე მედიასაშუალება აქტიურად მონაწილეობდა არჩევნების მონიტორინგის პროცესში. მაგალითად:

​

1. საინფორმაციო სააგენტო „TASS“ (აკრედიტირებულთა რაოდენობა: 3) - საინფორმაციო სააგენტო „TASS“ დაარსდა 1904 წელს, როგორც რუსეთის ტელეგრაფული სააგენტო. საბჭოთა კავშირის დროს „ТAСС“ გახდა ქვეყნის მთავარი საინფორმაციო ორგანო, რომელიც ემსახურებოდა სახელმწიფო პროპაგანდას. საბჭოთა კავშირის დაშლის შემდეგაც, სააგენტო რჩება სახელმწიფო საკუთრებაში და სრულად იმართება რუსეთის მთავრობის მიერ.

2. „რია ნოვოსტი“ (აკრედიტირებულთა რაოდენობა: 3) - „რია ნოვოსტი“ დაარსდა 1941 წელს, როგორც საბჭოთა საინფორმაციო ბიურო. მისი თავდაპირველი მიზანი იყო საბჭოთა პროპაგანდის გავრცელება მეორე მსოფლიო ომის დროს. ამჟამად ის შედის სახელმწიფო მედიაჰოლდინგ „Россия сегодня“-ში, რომელიც პირდაპირ კრემლის კონტროლს ექვემდებარება და გამოიყენება რუსეთის მთავრობის საერთაშორისო საინფორმაციო პოლიტიკის მხარდასაჭერად.

3. „იზვესტია“ (აკრედიტირებულთა რაოდენობა: 8) - „იზვესტია“ დაარსდა 1917 წელს, ოქტომბრის რევოლუციის შემდეგ. საბჭოთა პერიოდში გაზეთი მმართველი ელიტის ოფიციალური ხმის გამხმოვანებელი იყო. 1991 წელს, საბჭოთა კავშირის დაშლის შემდეგ, ის ფორმალურად გახდა კერძო კომპანია, თუმცა კვლავ მჭიდროდ არის დაკავშირებული კრემლთან და ასახავს მთავრობის პოლიტიკურ ხედვას.

4. „Ruptly“ (აკრედიტირებულთა რაოდენობა: 1) - „Ruptly“ ეს არის RT-ის (ყოფილი Russia Today) შვილობილი კომპანია, რომელიც დაარსდა 2005 წელს, როგორც კრემლის მიერ დაფინანსებული საერთაშორისო მაუწყებლობა. „Ruptly“ ახორციელებს ვიდეოკონტენტის წარმოებას და გავრცელებას, რაც კრემლის გლობალური საინფორმაციო პოლიტიკის ნაწილია.

5. „NTV“ (აკრედიტირებულთა რაოდენობა: 5) - „NTV“ დაარსდა 1993 წელს, როგორც დამოუკიდებელი ტელეკომპანია. 2001 წელს „გაზპრომმა“ შეიძინა მისი აქციები, რის შემდეგაც NTV გადაიქცა კრემლის საინფორმაციო პოლიტიკის ინსტრუმენტად, რაც გამოიხატა მთავრობის მხარდამჭერი შინაარსის გაძლიერებით და ოპოზიციური ხედვების შემცირებით.

​

ცესკოში აკრედიტებული  მედია ორგანიზაციის წარმომადგენელი ალექსანდრე კოპნოვი TASS-ის გენერალური დირექტორის მოადგილეა. მისი საქმიანობა მჭიდროდაა დაკავშირებული TASS-ის გლობალურ ოპერაციებთან, მათ შორის საერთაშორისო თანამშრომლობასთან, რაც აღინიშნა მისი ვიზიტების დროს, მაგალითად, ირანში მედია პარტნიორებთან შეხვედრისას. კოპნოვი, როგორც კრემლთან დაკავშირებული მედიის წარმომადგენელი, უკრაინაში არასასურველ პირად ითვლება და მას 2024 წელს ქვეყანაში შესვლაზე უარი უთხრეს, რაც უკრაინის მხრიდან პასუხია რუსეთის საინფორმაციო ომის წინააღმდეგ. ასევე​ „რია ნოვოსტი“ (RIA Novosti), „იზვესტია“ (Izvestia), „RT“ და მისი შვილობილი კომპანიები, როგორიცაა „Ruptly“  უკრაინაში აკრძალულია, რადგან მათ კრემლის პროპაგანდის გავრცელებაში მონაწილეობა ედებათ ბრალად. მათი საქმიანობა მიჩნეულია უკრაინაში რუსეთის საინფორმაციო ომის ნაწილად, რაც მიზნად ისახავს უკრაინის დესტაბილიზაციასა და დეზინფორმაციის გავრცელებას. ​

​

შესაბამისად, ცესკოს აღნიშნული სია ადასტურებს, რომ რუსეთის სახელმწიფო ან პრორუსულ მედიასაშუალებებს ცესკოს მიერ გაცემული ოფიციალურად აქტიური აკრედიტაცია ჰქონდათ მინიჭებული. ეს განსაკუთრებით პრობლემატურია საქართველოსთვის, ვინაიდან ოკუპანტი ქვეყნის მხრიდან ქვეყნის შიდა პოლიტიკაზე გავლენების ზრდის პირდაპირ ნიშანს წარმოადგენს.

​

რუსეთის სახელმწიფო ან პრო-რუსული მედიასაშუალებების აქტიური მონაწილეობა არჩევნების პროცესში არის საქართველოში რუსული გავლენის გაძლიერების მცდელობა, რაც მიუღებელია იმ კონტექსტში, როდესაც რუსეთს ქვეყნის სუვერენული ტერიტორიის 20% აქვს ოკუპირებული.